Бас прокурор: Балаларға арналған қауіпті онлайн ойын жасайтындар жазаланады

Бас прокурор Берік Асылов Қазақстандағы балалардың суицид мәселесіне қатысты пікір білдірді, деп хабарлайды Orda.kz.

Ол Бас прокуратураның «Көк кит» және «Қызыл дельфин» сияқты балаларға арналған қауіпті онлайн ойындарын жасағандарға қатысты қылмыстық іс қозғауға ниетті екенін атап өтті.

«Біз осыған қатысы барлардың бәріне қылмыстық іс қозғамақпыз. Балалар кіретін сайттарды тексердік. Бала орнында ойын ойнап көрдік. Онда шынымен де көп мазмұн бар. Олар балаларды тартады. Бірақ балалар мұны білмей, олармен хат жазыса бастайды. Осы деректерге сүйене отырып, біз жазылған мазмұнның суицидке әсер ететінін анықтау үшін сараптама тағайындадық. Бұны ұйымдастырғандарды анықтап, шара қолданамыз», – деді Берік Асылов атом электр стансасын салуға қатысты референдумда дауыс бергеннен кейін. 

Әзірге күдіктілер жоқ және олардың көпшілігі Қазақстанда емес екені анық.

«Біз бұл жағдайды қалай шешетінімізді әлі де ойланудамыз. Оның механизмі әзірге белгісіз. Мұны кім ұйымдастырғанын білмейміз. Бұл негізінен шетелдік сайттар, Оңтүстік Корея және басқа да елдердің көптеген сайттары бар. Балалар бұл сайттарда отырады және көреді. Біз мұны қазір тексеріп жатырмыз. Анықталса заңнамалық тұрғыда шаралар қабылдаймыз. Қылмыстық іс қозғауға тырысамыз. Аты-жөні мен адамды білсек, халықаралық қатынас арқылы да шығамыз», – деді. 

Бас Прокурор сонымен қатар балалардың суицид мәселесін шешу үшін «заңнамаға өзгерістер енгізілетінін» атап өтті. Алайда нақты қайсысы екенін нақтыламады. Ол өз-өзіне қол жұмсаудың көптеген себептері бар екенін және «оларды анықтау керек» екенін атап өтті.  

«Бұл ата-ананың да, мектептің де, мемлекеттік органдардың да міндеті», - деп қосты Асылов.  

Бұған дейін ол қарамағындағыларға балалардың суицид мәселесін нақты зерттеуді тапсырған болатын.