Бас прокуратура Нұрбол Назарбаевтың активтерін тексеріп жатыр

Бас прокуратура Болат Назарбаевтың ұлы Нұрбол Назарбаевтың активтеріне қатысты депутат Ринат Зайытовтың сауалына жауап берді, деп хабарлайды Orda.kz.

Бас прокурор Берік Асылов мәжіліс депутаты Ринат Зайытовтың сауалына жауап бере отырып, Нұрбол Назарбаевтың активтері тексеріліп жатқанын айтты. Депутат активтерді қайтару процесінде ашықтық болуын талап еткен еді.

«Заң шеңберіндегі жұмыспен сіздің сауалыңызда көрсетілген тұлға да қамтылған. Дегенмен, заңның 8-бабының 3-тармағына сәйкес активтерді қайтару жөніндегі уәкілетті орган мен комиссия мүшелері алынған мәліметтердің құпиялығын қамтамасыз етуге міндетті. Сіз көрсеткен ақпарат активтерді заңсыз иемденуге, шығаруға қарсы іс-қимыл және оларды қайтару барысында ескеріледі», – деп жауап берді Берік Асылов.

Бұған дейін мәжіліс депутаты Ринат Зайытов Назарбаевтар әулетінің заңсыз иеленген активтеріне қатысты бас прокурор Берік Асыловқа сауал жолдаған.

Сонымен қатар, Нұрбол Назарбаев 57 миллиард теңге көлеміндегі активтерінен және бизнесін басқару құқығынан айырылғаны хабарланған.