Бас прокуратура Назарбаев ескерткішін құлатқан жігітке қатысты пікір білдірді

Бас прокуратура талдықорғандық Азамат Батырбаевтың тыртықтары мен жарақаттарына қатысты түсініктеме берді.

5 қаңтарда Талдықорғанда 37 жастағы ер адам наразылық акциясына қатысқан. Өзге демонстранттармен бірге ол тұңғыш президент Нұрсұлтан Назарбаевтың ескерткішін құлатқан.

«2022 жылдың 22 қаңтарында Талдықорғандағы тәртіпсіздіктер кезінде құқық қорғау органдары қызметкерлеріне шабуыл жасағаны үшін ұсталды.

2022 жылдың 23 қаңтары жауап алу кезінде ол ішкі істер органдарының қызметкерлері 10 қаңтарда денесіне жарақат келтіргенін көрсеткен.

А. Батырбаевтың осы арызы негізінде Алматы облысының сыбайлас жемқорлыққа қарсы қызметі азаптау фактісі бойынша қылмыстық іс қозғады. Қазір тергеу амалдары жүргізілуде» деп хабарлады ҚР Бас прокуратурасының баспасөз қызметі.

Еске салсақ, қасіретті қаңтар кезінде Талдықорғанда алаңға шыққандар Назарбаевтың ескерткішін жүк тиегішке байлап, құлатқан. Артынша, бұл азаматтардың үстерінен іс қозғалған.

Ал кеше кешке қарай, ұсталған азаматтардың біріне ішкі істер органдары қысым көрсетіп, азаптағандары анықталды.