Бас прокуратура алименттен жалтарғандардың соңына түсті

Прокурорлар алимент бойынша жауапсыз борышкерлердің жасырын табыстарын анықтап, оларды қылмыстық жауапкершілікке тартуда.

Бұл туралы Қазақстан Республикасының Бас прокуратурасы хабарлады.

Биылғы жылдың 1 шілдедегі жағдайы бойынша 253 мың жауапсыз  ата-ананың 367 мың бала алдындағы борышы 19 млрд теңгеге жеткен.

Борышкерлер берешекті төлемеуді жұмыстың жоқтығымен ақтайды. Шынында да, олардың көпшілігі ресми түрде жұмыссыз және жұмысқа орналасу үшін шара қолданбайды немесе шынайы табыстарын электронды әмиянда сақтайды.

Қазіргі заманғы табыс көздері, такси, жеткізу қызметтері мен әлеуметтік желідегі оқырманы көп аккаунт иелері жақсы ақша табады.

Астана прокуратурасы электрондық әмияндарда 350 млн теңгеден астам сомаға өз ақшаларын жасырған 170 жауапсыз борышкерді анықтады.

Алимент төлеуден жалтару фактілері бойынша ҚК-нің 139-бабы бойынша 30 сотқа дейінгі тергеп-тексеру басталып, 45 млн теңгеге берешек өтелді.

Жалпы, жыл басынан бері прокурорлық қадағалау шараларымен 15,5 мың баланың құқықтары қорғалды, сот орындаушылары олардың пайдасына алимент бойынша 2,3 млрд теңгеден астам қарызды өндірді.  

Алимент төлеуден жалтарған 1,7 мың борышкер қылмыстық және әкімшілік жауапқа тартылды.