Бас имам: вакцина дінге қайшы емес және оразаны бұзбайды

Алматы қаласы орталық мешітінің бас имамы Еркінбек Шоқай вакцинаның оразаны бұзбайтынын және дінге қайшы еместігін айтты. Қалада имамдардың өздері  кезекпен вакцина салдырып жатыр.

— Бізде Қазақстан мұсылмандары діни басқармасының вакцина туралы пәтуасы бар. Онда екпенің бұлшық  етке енетін дәрі және оның қажет екендігі туралы айтылады. Сондықтан екпе оразаны бұзбайды, - деп түсіндірді бас имам. 

Алматыдағы  түрлі діни бірлестік  өкілдері өздерін және жақындарын қауіпсіздендіру үшін ғана емес, сонымен қатар пандемиямен күресте Қазақстан халқының бірлігін көрсету үшін, сондай-ақ діни орындарға  келушілерге екпе алуға болатынын, оның қажет шара екенін  көрсету үшін вакцина салдыру қажет деп шешкен. 

— Бүгінгі күні бұрынғы өмірге тез оралуға көмектесетін жалғыз құрал – вакцина алу. Соңғы кездері бұл емшара дінге қайшы келеді деген көптеген әңгімелер пайда болды. Ол шындыққа жатпайды. Вакцина алу оразаны бұзбайды, өйткені сұйықтық зат қанға ас қорыту жүйесі арқылы енбейді. Екпе  денсаулықты сақтауға және басқаларды қорғауға көмектеседі. Дін бұған қарсы келмейді, - деді Еркінбек Шоқай.

ҚМДБ мәліметтеріне сәйкес, ішке табиғи жолмен (ауыз, мұрын, тік ішек арқылы) енетін барлық нәрсе оразаны бұзады, ал егер зат ағзаға сыртқы қолдану арқылы енсе, онда ораза бұзылмайды.

Бұл туралы «Фатава Хиндия» кітабында былай делінген: «Май сияқты заттың тері тесігі арқылы енуі оразаны бұзбайды» (1-том, 266-бет). Вакцина-бұл бактериялар мен вирустар сияқты микроорганизмдерден алынған және адам ағзасына жұқпалы аурулардың алдын алу және иммундық қасиеттерді арттыру үшін енгізілген препарат, бұл ағзаны энергиямен қамтамасыз ететін қажетті тамақ немесе дәрумен емес. 

Осыған байланысты вакциналар (тері астына, бұлшық етке, көктамырға енгізілсе) оразаны бұзбайды.