Барлық жылу электр стансаларына жоспардан тыс тексеру жүргізіледі

ҚР Премьер-Министрі Қазақстанның барлық аумағында жылу электр стансаларына жоспардан тыс тексеру жүргізуді тапсырды.

Қазақстан Республикасының Премьер-Министрі Әлихан Смайылов Солтүстік Қазақстан облысының өнеркәсіп орындарын аралап, бірқатар тапсырмалар берді:

– 20 наурызда мұржаның жоғарғы бөлігінің ішінара опырылуы болған Петропавл 2-ЖЭО әкімшілігі жөндеу жұмыстарын мұқият тексеріп, белгіленген мерзімде аяқтасын;

- Энергетика министрлігіне - республиканың жылу электр стансалары мен су электр стансаларында жылу беру маусымына дайындығына жоспардан тыс тексерулер жүргізуді қамтамасыз етсін;

– Индустрия және инфрақұрылымдық даму министрлігі Қаржы министрлігімен бірлесіп – «Солтүстік» ӘКК жарғылық капиталын ұлғайтуға қаражат бөлсін.

Сондай-ақ Премьер-Министр М.Қозыбаев атындағы Солтүстік Қазақстан университеті  базасында жаңа оқу-зертхана ғимараты мен 600 орындық екі студенттік жатақхананың құрылысын аяқтауды тапсырды. Онда Аризона университетінің филиалын ашу жоспарланған.

Салынып жатқан «РимҚазАгро» ЖШС қағаз зауытында болған Әлихан Смайылов «қағаз өнімдерін өндіру жобасын жүзеге асыру өңірдің әлеуметтік-экономикалық дамуына мультипликативтік нәтиже беретінін» атап өтті.