Бәрі өз жауапкершілігін түсінді – Әшімбаев «Хабардың» резонанс тудырған ток-шоуы туралы

Сенат спикері Мәулен Әшімбаев «Хабар» телеарнасындағы «Бірақ» ток-шоуы төңірегіндегі дауға қатысты пікір білдірді. Бағдарлама ұйымдастырушылары шоуға тұрмыстық зорлық-зомбылық көрген әйелді шақырып, жылдар бойы зәбір көрсеткен күйеуімен татуластырмақ болды.

Әйел бұрынғы күйеуін де осы бағдарлама шақыртқанын білмеген. Бұл оған ұнамады. Ол оның кетуін өтінді. Соңында бұл оқиға қоғамда резонанс тудырып, бағдарлама жабылатын болды. Арна басшылығы кешірім сұрады.

Мәулен Әшімбаев «бір сәтсіз бағдарлама үшін бүкіл БАҚ жұмысына баға беруіне болмайды» деп есептейді.

«Қазақстан», «Хабар» сияқты телеарналардың қызметіне күмән келтіретіндей негіз жоқ. Кемшіліктер болса, оны айтуымыз керек. Біздің көзқарасымызды білдіруге, позициямызды айтуға құқығымыз бар. Бұл – қазіргі қоғамда қалыпты жағдай. Бірақ бәрі конструктивті болуы керек. «Хабар» тиісті шаралар мен шешімдер қабылдайды деп ойлаймын. Мәдениет және ақпарат министрлігі де бұл мәселені бақылауда ұстап отыр», - деді Әшімбаев сенат кулуарында.

Ол елге мемлекеттік те, тәуелсіз де БАҚ керек екенін баса айтты.