Банктер қазақстандықтардың шоттарын аңдымайды

«Банктер қазақстандықтардың шоттарындағы ақша туралы есеп беруге міндетті» деген қауесетке Мемлекеттік кірістер комитеті жауап берді, деп жазады ORDA.

Әлеуметтік желілерде осы жылдың басынан бастап барлық банктер мемлекеттік органдарға ел азаматтарының жеке шоттарындағы ақша қозғалысы туралы ақпарат беруге міндетті деген ақпарат пайда болды.

Ақпаратты таратушылар Салық кодексіне енгізілген түзетулерге сілтеме жасаған. Алайда, Мемлекеттік кірістер комитеті бұл деректерді ресми түрде жоққа шығарды. Комитет Салық кодексіне мұндай өзгерістер енгізілмегенін хабарлайды.

Департамент қазіргі уақытта тауарлар мен қызметтерге ақы төлеу кезінде кәсіпкерлер үшін төлемдер мен аударымдарды фискалдау мәселесі бойынша жұмыс істеп жатқанын растады. Бірақ бұл жеке тұлғалардың өз мақсаттары үшін аударған ақшаларына еш қатысы жоқ.

«Мемлекеттік кірістер органдары жеке тұлғалардың аударымдарын басқаруды жоспарламайды», - деп Мемлекеттік кірістер комитеті халық арасында әлеуметтік желілер арқылы тарап кеткен жалған әңгімеге нүкте қойды.