Банк саласындағы жағдай орнықты

Қазақстан Республикасының қаржы нарығын дамыту агенттігі соңғы апталарда банк клиенттері депозиттерінің өскенін растады. Еліміздің банк секторында депозиттер санының кемуі болған жоқ.

ҚР Қаржы нарығын реттеу және дамыту агенттігі клиенттердің екінші деңгейлі банктердегі депозиттеріне қатысты жағдай туралы хабарлады. Мәліметтерге сүйенсек, 24 ақпан мен 11 наурыз аралығында екінші деңгейлі банктердегі клиенттердің салымдары тек қана өсуде.

 «2022 жылдың 24 ақпанынан бастап екінші деңгейлі банктер клиенттерінің депозиттері 586 млрд теңгеге немесе 2,2%-ға өсіп, 26,8 трлн. теңгені құрады. Бұл ретте жеке тұлғалар  депозиттерінің үлесі 51,4% немесе 13,9 трлн. теңге.  Заңды тұлғалардың депозиттері – 48,6% немесе 13,1 трлн. теңгені құрады. Клиенттердің шетел валютасындағы депозиттерінің үлесі теңгенің шетел валюталарына қатысты бағамының өзгеруі аясында шетел валютасындағы депозиттерді қайта бағалау есебінен банктердегі барлық депозиттердің 39,5%-дан 41,9%-ға дейін өсті. Жалпы алғанда, банк клиенттерінің депозиттерінің өсуі елдің банк секторынан депозиттердің азаймағанын көрсетеді»  делінген министрлік таратқан хабарламада.

2022 жылдың қаңтарында «Қазақстанның депозиттерге кепілдік беру қоры» АҚ кепілдігімен халықтың депозиттеріне кепілдік берудің шекті мөлшері 20 миллион теңгеге дейін ұлғайтылғаны атап өтілді.

Агенттік кейбір ресейлік банктерге салынған санкциялардың Қазақстанның банк саласына жанама әсер еткенін мойындайды. Дегенмен, сарапшылардың пікірінше, қазақстандық банктердің және жалпы банк саласының қызметі зардап шеккен жоқ.