«Балық пен құс та өліп жатыр»: Маңғыстауда өлген итбалық саны мыңнан асты

Маңғыстау облысында теңіз жағасында тағы 300 итбалықтың өлексесі табылды, деп хабарлайды Orda.kz. 

Бұған дейін өлген итбалықтар саны 700-ге жеткенін хабарлаған едік. Ресми ақпаратқа сәйкес, қырылған итбалық саны мыңнан асты. 

11 қараша таңертең Маңғыстау облысының Қарақия және Түпқараған аудандарында Каспий теңізі жағалауынан 300 итбалық өлексесі табылды. Ақтаудан Қарақия ауданындағы Құрық портына дейінгі аумақта 115 итбалық, Түпқараған ауданындағы Қызылөзен ауылынан Форт-Шевченко қаласына дейінгі аралықта 185 итбалық өлексесі табылған. 

Гидробиология және экология институтының маманы Әсел Баймұқанова Каспий жағалауындағы итбалықтың жаппай қырылуына табиғи апат, теңіздің ластануы, індет себеп болуы мүмкін деп отыр. Итбалықтың өлексесі табылған жерден өлген құстар мен балықтар да табылып жатыр. 

Белсенді Сырғалай Меңдібай итбалықтардың өліміне балықшыларды кінәлағандарға жауап берді.