Қостанайда қар еріп, көліктер балшыққа батып жатыр

Қостанай қаласының маңындағы тұрғындар сазға батып бара жатқандықтарына шағымданып, облыс әкімі Архимед Мұхамбетовке видео-хабарлама жазды.

Бұл туралы Orda.kz tobolinfo.kz сайтына сілтеме жасап хабарлады.

Күнай ауылы Қостанайдан 15 шақырым жерде орналасқан. 2016 жылдан бастап ол облыс орталығына кірген. Осы уақыт аралығында бұл елді мекенде жолдар мен тротуарлар салынбаған. Тұрғындар қыстың күні тек жол бөлігі қардан тазартылатынын айтты. Соның салдарынан көктемде елді-мекен балшық пен еріген қар суына батып жатыр. Тұрғындар балаларын мектепке жіберіп, өздері жұмыс пен ауылдағы жалғыз дүкенге қалай барарларын білмей отыр. Сондықтан олар облыстық биліктен көмек сұрады.

– Біз түнде көлікті көшеде қалдырып кеткенбіз. Таңертең барсақ машинамыз балшыққа батып кетіпті. Қалай жолға шығамыз? Балалар мектепке, ал ересектер жұмысқа бара алмай отыр. Бізде екі аялдама бар, бірақ автобус екіншісіне бармайды. Тасқын судың кесірінен кейде дүкенге нан да келмейді, - деді ауыл тұрғындары өздерінің бейне үндеуінде.

Күнай елді мекеніне бес жылдан бері Konglomerat.KZ» ЖШС мердігерлік ұйымы қызмет көрсетеді. Оның басшысы Роман Канава ауыл тұрғындары айтып отырған проблемалар екі жыл бұрын пайда болған деп түсіндірді. Содан кейін ықшамауданды дамыту үшін олар коммуникация жүргізіп, саз қабатын көтерген. Оның айтуынша, кәсіпорын ауыл жолдарын сәл жер қарайғаннан кейін тәртіпке келтіреді.

– Қазір саз балшық судың өтуіне жол бермейді, айналаның бәрі былыққа айналды. Бірақ осы жағдайдың өзінде бірде-бір үйді су басқан жоқ. Экскаватор жүргізіп, мүмкіндігінше судың ағып кетуіне жол аштық. Қолымыздан келгеннің бәрін жасадық. Ол жерде суды тәулік бойы сорып отыруға болмайды ғой, бюджетте ондай көп ақша жоқ. Су сәл бәсеңдеп, құрғасын, біз бәрін жөндейміз, - деді Роман Канава.

Күнай ауылының тұрғындары ауылда әлі де қар көп екенін және жағдай күн сайын нашарлай түсетініне шағымдануда.