Баласының еміне 1,5 млрд теңге жинап, ақшаны жеке мақсатқа жұмсаған ерлі-зайыпты сотталды

Астанада әлеуметтік желіде баласының ауыр науқасына 1,5 млрд теңге жинаған Дәулет пен Толқын Тотақановтарға қатысты үкім шықты, деп хабарлайды Orda.kz.

Судья Қанат Тобағалиұлы ерлі-зайыптыны аса ірі көлемдегі алаяқтық және қылмыстық жолмен алынған қаражатты заңдастыру баптары бойынша кінәлі деп таныды.

Сот шешіміне сәйкес, Толқын Тотақанова 7 жылға бас бостандығынан айырылды. Оған 10 жылға қайырымдылық мақсатта ақша жинауға қатысты  қызметпен айналысуға тыйым салынды. Сондай-ақ, мүлкі тәркіленеді.

Кәмелетке толмаған баласының болуына байланысты жазасын өтеу екі жылға кейінге қалдырылды. Ал Дәулет Тотақанов сот залында қамауға алынды. Бұған дейін ерлі-зайыпты үйқамақта болған.

Айыптау тарапының мәліметінше, Тотақановтар бірнеше ауыр диагнозы бар ұлы Әлішердің атына әлеуметтік желіде бірнеше парақша ашып, Түркияда емделу үшін қаражат жинаған. Жиналған 1,5 млрд теңге баланың еміне емес,  қымбат дүкендер мен құмар ойындарға жұмсалған.