Баласын «тоқпақтап» тәрбиелейтін ата-аналар қатаң жазаланады  

16 қыркүйектен бастап Қазақстанда Қылмыстық кодекске енгізілген жаңа түзетулер күшіне енеді. Енді баланы оқтаумен ұрмақ түгілі шапалақпен тартып жіберген ата-аналар қылмыстық жазаға тартылуы мүмкін Orda.kz.

Жаңа түзетулер балаларды тәрбиелеу жөніндегі міндеттерді тиісінше орындамағаны үшін ата-аналар мен қамқоршылардың жауапкершілігін күшейтеді.

 Бұған дейін баланы ұрып-соғу әкімшілік құқық бұзушылық деп саналған. Баласына зәбір көрсеткен ата-аналарға 160 АЕК (2025 жылы шамамен 630 мың теңге) мөлшерінде әкімшілік айыппұл салынып немесе 40 тәулікке дейін қамауға алынатын болған.

Яғни, қатыгез ата-аналар ең көп дегенде 40 тәулікке қамалатын. 

 Бірақ енді жаза әлдеқайда ауырлайды:

• 1 000 АЕК-ке дейінгі айыппұл (2025 жылы шамамен 3,9 миллион теңге);

• егер қатыгез қарым-қатынас тәрбиелеу жөніндегі міндеттерді орындамауға әкелсе - 2 жылға дейін бас бостандығынан айырылады;

• егер зардап шеккен балалар екі және одан да көп болса -  3 жылға дейін бас бостандығынан айырылады.

 Қосымша сот кінәлілерді үш жылға дейінгі мерзімге белгілі бір лауазымдарды атқару немесе педагогикалық және өзге де қызметпен айналысу құқығынан айыра алады.

Жаңа түзетулер Қазақстандағы бала құқығын қорғауды күшейтіп, оларды қатыгездіктен қорғайды. Тәрбиелеу ата-ананың  міндеті, бірақ зорлық-зомбылық жасауға жол берілмейді.

 Айта кетейік, 2024 жылы 600-ден астам қазақстандық ата-ана құқығынан айырылды. Балаларды тәрбиелеу бойынша міндеттерін орындамайтын 6 мыңнан астам ата-ана профилактикалық есепке алынды.

Жақында Семейде оқушыны соққыға жыққан жасөспірімдердің аналары ата-ана құқығынан айырылды. Сонымен қатар былтыр сот экс-министр Қуандық Бишімбаевты ата-ана құқығынан айыруға негіз жоқ деп таныды.