Баласын көпірден лақтыруға кедергі келтірген әйелін пышақтаған ер адам сотталды

2021 жылдың жазында Атырауда балаларын бұрынғы жұбайынан тартып алып, артынша оны пышақтап кеткен ер адам сотталды. Ер адам баласын көпірден лақтырамын деп әйелін бопсалаған.

Үйінде бірнеше рет жанжал шығарған күйеуі әйелін ұрып-соғып, одан үш баласын тартып алған. Әйел Атырау қалалық полиция басқармасына күйеуінің үстінен арыз жазған. Бірақ жазылған бірнеше арызы да дұрыс қаралмаған. Тек бұл оқиға қоғам талқысына түскен кезде, күйеуі әкімшілік жауапқа тартылған.

2021 жылдың 22 тамызында күйеуі әйеліне балаларды алып кетпесе, оларды көпірден лақтырып жіберемін деп қорқытқан. Әйел балаларын құтқаруға барған жерде өзі пышақталған.

Іс сотқа ҚР Қылмыстық кодексінің 99-бабымен (Адам өлтіруге оқталу) түскен. Бірақ іс 106-бабқа (Денсаулыққа қасақана ауыр зиян келтiру) өзгертілген.

«ҚР Тәуелсіздігінің отыз жылдығына байланысты рақымшылық жасау туралы» Заңына сәйкес түпкілікті 3 жыл 5 ай бас бостандығынан айыру жазасы тағайындалды» делінген соттың баспасөз қызметінде.