«Баланы бақыртып тепкілеп жатыр»: Желіде белгісіз ер адамның сәбиді тепкілеген бейнесі тарады

Болған оқиғаның видеосын «Не молчи» қоры әлеуметтік желі арқылы таратты, деп хабарлайды Orda.kz порталы.

«Жазылушыдан шұғыл хабарлама келіп түсті. Видеода ер адам 4-5 жастағы баланы тепкілеп жатыр. Жанында дәл сол жастағы қыз бала жылап, еңіреп отыр. Екеуі де бақырып жылайды. Үй лас. Балалар азып-тозып кеткен. Бұған қараудың өзі мүмкін емес» делінген хабарламада.

Не молчи қорынан Дина Таңсәрі бұл мәселені балалардың құқықтары жөніндегі жауапты Динара Зәкиеваға, Жетісу және Түркістан облыстарының полиция департаменттеріне пысықтауды сұрады.

«Біз оқиғаның қайда болғанын білмей отырмыз. Өзбек тілінде айтып жатқанымен біздің елдің оңтүстігінде болғаны туралы ақпарат бар. Бізге осыны  жіберген әйел жазбадағы адамның сөз мәнері Қарабұлақ ауылы тұрғындарының тіліне ұқсайтынын айтады» дейді Не молчи қоры.

Еске салайық, кеше Мәжілісте әйелдердің құқығы мен балалардың қауіпсіздігін қамтамасыз ету үшін бірқатар заңға енгізілетін өзгерістер талқыланған еді. Заң жобасын мәжілісте депутаттар әзірлеген.