Баламды ешкім ұрған жоқ: Қонаевтағы ауруханаға түскен оқушы туралы тың ақпарат мәлім болды

Қонаев қаласында оқушы көпірдің астында соққыға жығылып жан сақтау бөліміне түсті деген ақпарат тараған болатын.  Orda.kz тілшісі Қонаев қаласына барып, мектеп директорымен және оқушының анасымен тілдесті.

Қонаев қаласында мектеп оқушысын көпірдің астында сыныптастары соққыға жығып, жансақтау бөліміне түсті деген ақпарат желіде тарады.

Ресми деректерге сүйенсек, 31 қаңтарда 9-сынып оқушысы Қонаев қалалық көпсалалы ауруханасына «химиялық антисептикпен улану» диагнозымен түскен. Дәрігерлер оның өміріне қауіп жоқ екенін, қазіргі таңда жағдайы тұрақты екенін айтты. Ал полиция «өзін-өзі өлтіруге жеткізу» бабы бойынша қылмыстық іс қозғап, тергеу амалдарын бастады.

Желіде тараған «оқушыны соққыға жықты» деген ақпаратқа қатысты баланың анасы видеоүндеу жасады.

«31 қаңтарда ұлым ауруханаға түсті. Бірақ оны ешкім ұрып-соққан жоқ. Көпірдің астында төбелес болғаны да өтірік. Жалған ақпаратқа сенбеңіздер!», деп мәлімдеді ол.

Білім бөлімі мектеп-гимназияда тәртіптік жағдайды тексеру үшін арнайы комиссия құрды. Мектеп директоры Гүлзат Ержанованың айтуынша, оқушы – үлгілі, тәртіпті бала.

«Сынып жетекшісі жедел жәрдем шақыртқанын айтты. Баланың автобустан жалғыз түсіп, үйіне кетіп бара жатқанын көшедегі камералар көрсетті. Сыныптастарымен де ешқандай жанжал болмаған. Оқушының өзі де "ешкім ұрған жоқ" деп отыр», – деді ол.

Мұғалімдердің айтуынша, бала көшеде кетіп бара жатып өртеніп жатқан бір затты байқап, сөндіруге тырысқан. Алайда, ата-анасы оның күйіп қалғанын көріп, біреулер ұрып тастады деп ойлаған. 

Қазіргі таңда оқушы Қонаев қаласынан Алматы облысындағы балалар ауруханасына ауыстырылды. Аурухана өкілдері оқушының жансақтау бөлімінде жатқанын хабарлады.