Баламалы энергетиканы дамыту туралы заң әзірленуде

Заң экологиялық таза энергия көздерін дамытуды ынталандыруға арналған, деп хабарлайды ҚР Премьер-Министрінің сайты.

— Экологиялық таза энергия көздерін дамытуды ынталандыру мақсатында баламалы энергетиканы дамыту туралы жаңа заң әзірленуде. Қазақстанның 2025 жылға дейінгі инвестициялық саясатының жаңа тұжырымдамасы ESG және жасыл экономика қағидаттарын сақтауға негізделеді, - деді ҚР Премьер-Министрі Әлихан Смайылов инвестициялық ахуалды жақсарту жөніндегі кеңес отырысында.

Сонымен қатар, үкімет 2060 жылға бағытталған көміртегі бейтараптығы доктринасын әзірлеуде. Оған сәйкес Қазақстанның экономикасы түрлендіріледі.

Смайылов өткен жылы жаңа экологиялық кодекс қабылданғанын да атап өтті. Кодекс мемлекеттік экологиялық реттеу стандарттарын айқындайды, жасыл инвестицияларды тартуды ынталандырады және халықаралық экологиялық міндеттемелердің орындалуын қамтамасыз етеді.