Балалар үйінің түлектері Тоқаевқа: «Тұратын жеріміз жоқ»

Балалар үйінің түлектері Қазақстан Президенті Қасым-Жомарт Тоқаев пен Алматы қаласының әкімі Ерболат Досаевқа ұжымдық бейне үндеу жазды. Олар видеосында баспана бөлу мәселесін көтерді, деп хабарлайды Orda.kz.

Бейнежазбаны 100baksoff қоғамдық ұйымы Instagram желісінде жариялады.

«Тоқаев мырза, Досаев мырза, бізге назар аударыңыздар: біздің тұратын жеріміз жоқ! Балалар үйінің мыңнан астам түлегі көшеде қалдық. Жалдамалы баспана тым қымбат. Пәтерлердің қалай берілетініне назар аударыңыз. Балалар үйінің түлектерін неге баспанамен қамтамасыз етпейді?», – деді арызданушылардың бірі.

Тағы бір жас жігіт 2014 жылдан бері баспана кезегінде тұрғанын атап өтті. Соңғы екі жыл бойы кезектің шеті де қозғалмаған.

«Егер кезек дәл осылай жылжыса, мен 78 жасқа келгенде пәтер алады екенмін. Бізге, балалар үйінің тәрбиеленушілеріне тезірек пәтерлерімізді алуға көмектесуіңізді сұраймын», - дейді балалар үйінің түлегі. 

Алматы әкімдігі  осы видеоүндеу бойынша Orda.kz сайтына түсініктеме берді. Мекеменің хабарлауынша, видеодағы жастардың баспана алу кезегі мегаполистің өзінде емес, Алматы облысында екен.

«Бейнежазбада Қазақстан Президенті мен Алматы әкіміне өтініш білдірген азаматтар Алматы облыстық №1 балалар үйінің түлектері және Алматы облысы әкімдігінде баспана кезегінде тұрғандар (олар Алматы қаласының тұрғын үй алу кезегі тізімінде жоқ).  Қазақстан Республикасы «Тұрғын үй қатынастары туралы» Заңы 71-бабының 1-тармағына сәйкес тұрғын үйге мұқтаждарды есепке алу азаматтардың тұрақты тұратын жері бойынша жүзеге асырылады. Осыған байланысты тұрғын үймен қамтамасыз ету мәселесін шешу өтініш авторлары кезекте тұрған Алматы облысы әкімдігінің құзыретіне жатады», - деді әкімдіктен.