Балалар үйінен ақша жымқырғандарға қатысты тергеу басталды

«Qamqor» жедел алдын алу іс-шарасы аясында Нұр-Сұлтан қаласындағы балалар үйлерінің бірінде жетім балаларға азық-түлік сатып алуға бөлінген бюджет қаражатын жымқыру дерегі бойынша сотқа дейінгі тергеуді басталды.

Бұл туралы Orda.kz Қаржылық мониторинг агенттігінің баспасөз қызметіне сілтеме жасап хабарлайды. 

Тергеу осы мекеменің директоры мен бас есепшісі сатып алу ережелерімен қарастырылған процедураларды өткізбей, басқаруындағы үлестес кәсіпорынмен азық-түлік жеткізуге шарттар жасағандығын анықтады. Компанияның нақты иесі - бас есепшінің бұрынғы жұбайы.

2019-2020 жылдар кезеңінде жасалған шарттар бойынша лауазымды тұлғалар аталған компания арқылы бөлінген 130 млн теңге бюджет қаражатынан жетім балаларға азық-түлік сатып алуға бөлінген 25,9 миллион теңгені жымқырған.

Қазір бұл жағдайға қатысты тергеу жалғасып жатыр. Өзге ақпарат тергеу мүддесіне орай жария етуге жатпайды.