«Балалар бөлінбейді»: Алматы әкімдігі «Бағанашыл» балалар үйі туралы ресми мәлімдеме жасады

Алматы әкімдігі «Бағанашыл» балалар үйіне қатысты туындаған дау-дамайдан кейін ресми түсініктеме берді. Әкімдіктің хабарлауынша, қазіргі таңда нысанды басқа мекемеге беру жұмыстары жүргізіліп жатыр, деп хабарлайды Orda.kz.

«Балалар үйінің ғимаратын қайта жаңғырту жоспарланған. Бұл жұмыс техникалық тексеру, құжаттаманы әзірлеу, сараптама және конкурс өткізу шараларынан кейін келесі жылы басталады»,  деп мәлімдеді әкімдіктің баспасөз қызметі.

Қайта жөндеу кезінде балалар уақытша басқа жерге көшіріледі. Бірақ әкімдік оларды бөлмейтінін және барлық қауіпсіздік пен тұрмыстық жағдай сақталатынына уәде етті.

«Балалардың оқу процесі Алматы қаласындағы өздері оқып жүрген мектептерде үздіксіз жалғасады. Балалар үйінің тәрбиеленушілерін Қонаев қаласына көшіру мәселесі қарастырылып жатқан жоқ. Жағдай толық бақылауда», – деді әкімдік өкілдері. 

Еске сала кетсек,  Алматыдағы №1 балалар үйін Қонаев қаласына көшіру туралы шешімге балалар қарсы шығып, автобустың жолын бөгеп, наразылық танытты. Олар кішкентай топтың балаларын алып кетуге қарсылық танытып, қақпаның алдына тұрып алды. Балалар қарсыласқан соң, әкімдік полиция қызметкерлерін шақырып, шара қолданбақ болды. Содан жазықсыз балалардың кейбіреуі жарақат алды. Ақыры Тоқаевтың тапсырмасына сәйкес, балалар үйі көшірілмейтін болды.