Балабақшаға тапаншамен кірмек болған ер азамат ұсталды

Алматы қаласы Наурызбай ауданында ер адам баласын алып келіп, балабақша аумағына тапаншамен қорқытып кірмек болған.

Бұл туралы Orda.kz хабарлайды.

Полиция желіде видеосы тараған ер азаматтың қаруға рұқсаты бар екенін анықтады. Ер адам «Елисейские поля» коттедж қалашығындағы «Ашамай-2» балабақшасына тапаншамен кіруге тырысқан.

Күзетші мектепке дейінгі мекемеде өрескел қылық жасаған ата-анаға нұсқаулық бойынша полиция шақырған.

Алматы полиция департаменті жағдайға қатысты түсініктеме берді.

– Аталған фактіні Наурызбай аудандық полиция басқармасы тіркеген. Қазіргі уақытта тексеру жүргізілуде. Тапаншаның газ екені және ресми рұқсаты бар екені анықталды, - деді ведомствоның баспасөз қызметі.

Полиция департаменті мән-жай анықталғаннан кейін заңға сай әрекет ететіндерін жеткізді.