Балқаш тұрғыны тергеу изоляторындағы досынан хат алған

Алматыдағы тәртіпсіздік кезінде жоғалып кеткен Рахым Чахаловты іздеп жүрген Балқаш қаласының тұрғыны оқиғаның мән-жайы туралы айтты. Іздеп жүрген досының Алматыдағы ЛА-155/18 тергеу изоляторында екені анықталған.

Айтуынша, Рахым Чахалов оған жазба берген.

– Ира адвокатпен көмектес. Сау жерім жоқ, ұрып тастаған. Мен істемеген қылмыстарды да мойныма іліп қойды, - делінген жазбада.

Бұл хатты алғаннан кейін Ирина көршілерінен жаңа ақпарат естігенін айтады.

– Көршілер Рахымды үйінен шығарып алып, жедел жәрдем көлігіне отырғызғанын айтады. Ол өз бетімен жүре алмаған. Пәтерде шу болған, - деді Ирина.

Бойжеткеннің айтуынша, 24 қаңтарда ол жалдаған адвокат Чахаловқа барып, оның денесінде ұрып-соғу ізі барын көрген. Ирина Алматы полиция департаментіне, Алматы прокуратурасына, бас прокурорға, Тоқаевқа сауал жазған.