Байзақтағы жарылыстан қаза тапқан әскерилерге арналған мемориал ашылды

Жамбыл облысындағы әскери қоймада болған жарылысқа жыл толды. 17 адамның өмірін жалмаған сұмдық жағдай елдің есінде.

Оқыс оқиға кезінде ерлікпен опат болғандарды еске алу жиыны өтті. Марқұм болған әскерилерге арналған мемориал тұрғызылды. Жиынға жарылыстан ажал құшқандардың туыстары жиналып, олар туралы естеліктерін айтты.

Қаза тапқандардың бәрі мемлекеттік наградаға ұсынылды. Президент Жарлығымен құтқарушы Мейіржан Аймановқа «Халық Қаһарманы» атағы берілді. 16 адам І және ІІ дәрежелі «Айбын» орденімен марапатталды. Мемориалға 17 адамның есімі қашап жазылған.

Еске салайық, бір жыл бұрын Байзақ ауданындағы оқ-дәрі сақтау қоймасында жойқын жарылыс болды. Қайғылы жағдайдан 17 адам көз жұмды. Оқыс оқиғаның себебі әлі айтылмаған. Бұл іс бойынша 6 адам түрлі баппен тергеліп жатыр.