Байден Орталық Азиядағы бес ел президенттерімен кездесу өткізеді

АҚШ президенті Джо Байден келесі аптада Орталық Азиядағы бес елдің басшыларымен кездеседі. Бұл туралы оның ұлттық қауіпсіздік жөніндегі кеңесшісі Джейк Салливан мәлімдеді, деп  Orda.kz. РИА Новостиге сілтеме жасап хабарлайды.

«Президент Орталық Азияның бес мемлекетінің – Қазақстан, Қырғыз Республикасы, Тәжікстан, Түркіменстан және Өзбекстанның президенттерімен кездеседі. Бұл С5+1 форматындағы тұңғыш президенттік саммит болмақ», - деді Салливан брифингте.

Кездесу Нью-Йоркте өтеді, онда Байден БҰҰ Бас Ассамблеясының жыл сайынғы отырысының «жоғары деңгейдегі аптасына» қатысуға барады. Онда ол Украина президенті Владимир Зеленскиймен, Израиль премьер-министрі Биньямин Нетаньяхумен, Бразилия президенті Лула да Силвамен және БҰҰ Бас хатшысы Антониу Гутерришпен кездесуге ниетті.

Қырғызстан президенті әкімшілігінің сыртқы саясат бөлімінің меңгерушісі Мұратбек Азымбакиевтің айтуынша, Байденнің Орталық Азия елдерінің басшыларымен кездесуі 19 қыркүйекте болады деп күтілуде. Қырғыз Республикасының Президенті Садыр Жапаровтың өзі 17-21 қыркүйекте Нью-Йоркке жұмыс сапарымен бармақшы.