Байден «Американы құтқару» үшін әдейі «алжыды» деген күдікке ұрынды

X әлеуметтік желісінің қолданушылары АҚШ-тың қазіргі президенті Джо Байден алжу белгілерін әдейі бейнеледі деген жаңа қастандық теориясын қызу талқылап жатыр, деп хабарлайды Orda.kz.

Дәлел ретінде саясаткердің халыққа соңғы үндеуінің бейнежазбасы ұсынылды.

Пайдаланушылар соңғы сөзінде Байден өзін сенімді ұстағанын, дәйекті сөйлегенін, қателеспегенін және бұрынғыдай жүйесіз лағып кетпегенін талқылады. Америкалықтар да 81 жастағы мемлекет басшысының аяқ астынан аса зерек болып кеткеніне таң қалуда.

Пікір білдірушілер Байден туралы «не алжудың емін тапты немесе осы уақыт бойы жұртшылықты алдап келген» деген болжамдарын жолдады.

Тіпті біреуі Байденнің «Тақтар ойынындағы» Кішкентай саусақ кейіпкері сияқты «Америка Құрама Штаттарын құтқару» үшін өткен жылы әдейі оғаш әрекет жасағанына сенімді екенін жазды.