Байбектің артынан Бергей Рысқалиев сакурамен видео жариялады

Атырау облысының бұрынғы әкімі Бергей Рысқалиев Лондон саябағында серуен видеосын жариялады, деп хабарлайды Orda.kz. 

Бергей Рысқалиевтің гүлдеген сакура ағаштарының астында серуендеп жүрген видеосы оның TikTok арнасында жарияланды. Бейнежазбада геолокация көрсетілмеген, сондықтан кейбір көрермендер Рысқалиев Жапонияда жүр деп ойлап қалуы мүмкін.

Orda.kz жүргізген фактчек нәтижесінде Рысқалиевтің Евразияның екінші шетіне, яғни Жапонияға бармағаны анықталды. Ол Лондонда орналасқан Гринвич саябағында серуендеген. Бұл орын көктемде гүлдейтін сакураларымен танымал.

Айта кетейік, бұған дейін Алматының бұрынғы әкімі Бауыржан Байбек Жапонияда көзге түскен еді. 

Өзін шетелдегі казақстандық оппозиция өкілдерінің бірі етіп көрсететін экс-шенеунік Бергей Рысқалиев — 1967 жылы 21 қаңтарда Гурьев облысы Мақат ауданында дүниеге келген. Бергей Рысқалиев 2006 жылы Атырау облысының әкімі болды. Кейін 2012 жылы Атырау облысының әкімі қызметінен кеткеннен кейін бірден елден де кетіп қалды. 2013 жылдың қаңтар айының соңында Бергей Рысқалиевқа іздеу жарияланды. 

Еске салайық, Ресей тыңшылары  Рысқалиевті аңдығанын мойындады.