Байбек: Нұрсұлтан Назарбаевты жата жамандау елдігімізге, азаматтығымызға сын

Nur Otan партиясы төрағасының бірінші орынбасары Бауыржан Байбек видео байланыс арқылы өткен жиналыс кезінде Қазақстанның бұрынғы президенті Нұрсұлтан Назарбаев туралы айтты.

Оның айтуынша, қазір Тұңғыш президент туралы түрлі пікір білдіретін адамдар көбейген.

«Қазір тұңғыш президентіміз Нұрсұлтан Назарбаев туралы да небір пікір айтушылар көбейді. Өткенге баға беру әркімнің қолынан келеді. Бірақ, ақиқат пен жалғанды ажырату әркімнің өз ар-ұятына байланысты. Айналып келгенде анығын бір Құдай біледі. Ең қиын кезеңде, яғни біз «мемлекет боламыз ба, болмаймыз ба?» деген сонау алмағайып 90-шы жылдары Нұрсұлтан Әбішұлы Назарбаевтың басшылығымен Қазақстан Тәуелсіз мемлекет болып қалыптасты. Етек жеңін жиды. Төңірегімен терезесі теңесті. Жалпы әлемдік қауымдастық мойындады. Елбасымен сол кездегі аға ұрпақтың 30 жыл бойы мемлекеттің іргесін бекітіп, шекарасын шегендеп, территориясының тұтастығын сақтауға сіңірген ерен еңбегі тарихта өз оң бағасын алары сөзсіз» деді Бауыржан Байбек.

Бауыржан Байбек мемлекет басшысы қызметінен кеткен Нұрсұлтан Назарбаевты жамандау, даттау азаматтыққа сын деп есептейді.

«Мемлекет басшылығынан кеткен Нұрсұлтан Назарбаевты жата жамандау елдігімізге, азаматтығымызға сын. 30 жылға енді толған Тәуелсізідгімізді баянды ету үшін біз қазақстандық қоғамда мемлекеттіліктің дәстүрін қалыптастыра білуіміз шарт. Оның ішінде билік сабақтастығының дәстүрін. Сондықтан Тұңғыш президенттің артынан бас-көз жоқ топырақ шашпайық. Бәріне шын төреші - уақыт. Біз үшін қазір елдігімізді сақтау, барды ұстау аса маңызды» деп топшылады Nur Otan партиясы төрағасының бірінші орынбасары.