Байбазаров Маңғыстаудағы ереуілдер себебін зерттеуге уәде берді

Ұлттық экономика министрі - вице-премьер Нұрлан Байбазаров Маңғыстау облысындағы ереуілшілердің проблемалары туралы сұраққа жауап бере алмай, мәселені зерделеуге уәде берді, деп хабарлайды Orda.kz порталы.

Үкімет дәлізінде Байбазаровтан Маңғыстау облысындағы ереуілшілер проблемалары туралы сұралған болатын.

«Сұрақты нақтылайық. Күн сайын елде болып жатқан ақпарат келіп түседі. Біз оқимыз, көреміз, білеміз. Бірақ қандай шара қабылданатынын жіті анықтап алғаннан кейін хабарлайтын боламыз», - деді ол. 

Естеріңізге сала кетейік, Маңғыстау облысындағы West Oil Softwar мұнай сервистік компаниясының жұмыскерлері  ереуілге шығып, қатысушыларға қысым көрсетіліп жатқанын айтқан еді.

Ал 29 қаңтарда Жаңаөзенде жаңа ереуіл басталды. Бұл жолы «Кезби» мұнай сервистік компаниясының қызметкерлері өз талабын білдірді. Ереуілшілер бұрын жалақысын көбейтуді талап еткен және басшылық 10% үстеме ақыға келіскен. Алайды жұмысшылар өз кірісін 50% арттыруға қол жеткізуді көздеп отыр.

Тағы бір талап — жағдайға жауапты деп санайтын бірнеше басшыны жұмыстан шығару. Жұмысшылар компания ғимаратының жанында түнеп, ереуілді жалғастымақшы.