Баянауылдағы өрт 6 мың гектарға жетті

Қарағанды облысынан шыққан өрт Баянауыл ұлттық табиғи паркі аумағына тарап, 6 мың гектар жерге жеткен, Orda.kz деп  хабарлайды.

Павлодар облысының әкімі Асайын Байхановтың әлеуметтік желіде  атап өткеніндей, өртпен күреске 310 адам, 51 техника, екі тікұшақ және 3 ұшқышсыз ұшу аппараты жұмылдырылды. Өрт оқшауланып, бірақ әлі толық сөнбеген, әзірге адам шығыны жоқ екені айтылды.

Өрттің алдын ала себебі – шөп шабу барысында қолданылатын техниканың ақауы болуы мүмкін деген болжам бар. Әкім барлық шаруаларға техникаларын тексеріп, шөп қоры сақталатын аймақтарды уақытылы жырту қажеттігін ескертті.

«Мұндай өрттердің негізгі себептерінің бірі - шөп шабу кезінде қолданылатын техникалардағы ұшқын сөндіргіш құрылғылардың істемеуі. Сондықтан, барлық шаруа қожалықтарынан міндетті түрде ұшқын сөндіргіш құрылғылар болуы тиіс қолданыстағы техникаларды тексеруді, сондай-ақ, өз шаруашылықтары мен үйлерінің, әсіресе, шөп қоры сақталатын орындардың айналасын уақытында жыртуды сұраймын» деп жазды Байханов.

Еске сала кетейік, осы өрттің Қарқаралыдағы жағында 1 адам қаза тауып, 4 адамды күйік шалған болатын.