Баян Мақсатқызы Қайрат Сатыбалдының әйелінің рейдерлікке қатысы бар екенін айтты

Белгілі қазақстандық продюсер Баян Мақсатқызы Қайрат Сатыбалдының әйелі Гүлмира Сатыбалдының рейдерлік әрекетке қатысы туралы сұраққа жауап беруге уәде берді.

«Адамдар менен «бұл рас па?» деп жиі сұрайды. Шындығында не болды? Біз бұл сұраққа барлық ақпаратты бере отырып, жауап беруге дайынбыз. Сол кезде халыққа белгілі есімдер жарияланады. Бұл оқиға жұртты ерекше таң қалдырмайтынына сенімдімін. Өйткені еліміздің жүздеген кәсіпкерлері осындай жағдайға тап болды, олардың сотқа жүгінуге мүмкіндігі болмады, себебі белгілі адамдар тарапынан қысым көрсетілді. Мен Galanz Bottlers компаниясын рейдерлік басып алудағы кінәлілер мен олардың сыбайластарының барлық аты-жөні мен фамилиясын атаймын. Жақын арада тергеу органдары бизнесті тартып алуға қатысты барлық қажетті айғақтарды алады» деді Мақсатқызы әлеуметтік желідегі парақшасында.

Гүлмира Сатыбалды Алматы тұрғынының кәсібін тартып алды деген ақпаратқа ол осылайша пікір білдірді.

«Біз көп нәрсені білдік, Назарбаевтың немере інісі мен оның әйелінің қол астындағы басқа да құрбандардың есімдерін білдік. Кәсібінен айрылған адамдардың аты-жөнін естігенде, таң қалатыныңызға сенімдіміз» делінген видеода Мақсатқызының бұрын Galanz Bottlers компаниясының ірі үлесіне ие болған күйеуі Тұрсенғали Алакөзевпен бірге.

Еске салсақ, 13 наурызда ҚР тұңғыш президенті Нұрсұлтан Назарбаевтың немере інісі Қайрат Сатыбалдының лауазымдық өкілеттігін асыра пайдалану және «Қазақтелеком» АҚ қаржысын жымқыру фактілері бойынша Алматыда ұсталып, уақытша ұстау изоляторына қамауға алынғаны белгілі болды. Сатыбалдының мемлекет қауіпсіздігіне нұқсан келтіретін басқа да қылмыстарға қатыстылығы да қазір тексеріліп жатыр.

14 наурызда «Қазақтелеком» кеңселерінде тінтулер жүргізілгені де белгілі. Ондағылар бұл ақпаратқа түсініктеме беруден бас тартты.