«Баяғыда нүктесі қойылған» - Тоғжанов Жаңаөзен оқиғасы туралы

Вице-премьер Ералы Тоғжанов 2011 жылғы Жаңаөзен оқиғасын қайта тексерудің қажеті жоқ деген ойда.

БАҚ өкілдері қазіргі таңда 2011 жылғы Жаңаөзен оқиғасында 17 адам қаза болғанына сенбей, олардың саны әлдеқайда көп екенін алға тартты. Бірақ Тоғжанов жұртшылықты ресми ақпаратқа ғана сенуге шақырды.

«Барлық шындық ашылды. Баяғыда нүктесі қойылған» деді вице-премьер үкімет отырысында БАҚ өкілдерінің сұрақтарына жауап беріп.

Еске салсақ, 2011 жылы ел тәуелсіздігінің 20 жылдығын тойлап жатқанда Жаңаөзенде полиция мен ереуілге шыққан мұнайшылар арасында қақтығыс болды. Бұған дейін жалақыны көтеруді талап еткен мұнайшылар ереуілге шыққан. Полиция демонстранттарға оқ жаудырған. 100-ден астам адам жарақат алып, қаза тапқандар да болған.

Нұрсұлтан Назарбаев 2011 жылы Жаңаөзендегі тәртіпсіздікті ұйымдастырды деп қашқын банкир Мұхтар Әбіләзовті айыптады.