Байқоңырдан металл алып шығуға рұқсат берген басшы істі болды

Кәсіпорын басшысы пара алып, Байқоңыр аумағынан 200 тонна қара металл алып шығуға рұқсат бергені үшін сот үкіміне шырмалды.

Байқоңыр аумағынан қара металл алып шығуға рұқсат берген мемлекеттік кәсіпорын басшысының міндетін атқарған азаматқа сот үкім шығарды.

Сыбайлас жемқорлыққа қарсы іс-қимыл агенттігінің аса маңызды істер жөніндегі тергеушісі Данияр Бегайдаровтың айтуынша, іс Қызылорданың №2 сотында қаралған.

Цифрлық даму, инновациялар және аэроғарыш өнеркәсібі министрлігі аэроғарыш комитетінің қарамағындағы «Инфракос» республикалық мемлекеттік кәсіпорны бас директорының міндетін атқарушы сот алдында жауапқа тартылды.  

Жауапты тұлға жүйелі түрде жалпы сомасы 600 мың теңге болатын пара алды деген күдікке ілінген. Заңсыз ақша ол кісіге жеке компания арқылы жеткізіліп тұрған.

Бас директор болса Байқоңыр ғарыш айлағы алаңында орналасқан «Инфракос» кәсіпорны аумағынан 200 тонна қара металды еш кедергісіз алып шығуға рұқсат берген.

Сот 29 шілдеде үкім шығарды. Ер адам 366-баптың 2-бөлімі – «Пара алу» ісі  бойынша кінәлі деп танылды. Енді оған 17,6 миллион теңге көлемінде айыппұл ілініп, мемлекеттік қызмет атқаруға тыйым салынды.

 Аталған сома  пара көлемінен 30 есе көп.