Байқоңыр ғарыш айлағынан әлемдегі ең алғашқы «киноэкипаж» ұшырылды

Байқоңыр ғарыш айлағынан әлемдегі ең алғашқы «киноэкипаж» ұшырылды. Халықаралық ғарыш стансасына дейінгі ұшу шамамен 3 жарым сағатқа созылады.

Бұл туралы Orda.kz 24.kz-ке сілтеме жасап хабарлайды.

Зымыран-тасығыштың «Рассвет» модулімен түйісуі Нұр-Сұлтан уақытымен 17:12-ге жоспарланған. Кеме бортындағы ғарышкер Антон Шкаплеров, актриса Юлия Пересильд және режиссер Клим Шипенко әлемде бірінші болып ғарышта көркем фильм түсіруді жоспарлап отыр.

Туынды ғарышкердің өмірін құтқару үшін орбитаға аттанған дәрігер әйелдің оқиғасы туралы болмақ. Актриса мен режиссер мамырдан бастап арнайы орталықта дайындықтан өткен. Олардың түсірілім жұмыстары 12 тәулікке созылуы тиіс. Ал бірге ұшқан ғарышкер Антон Шкаплеровтың миссиясы 174 күнге, яғни келесі жылдың көктеміне дейін жалғасады.