Бахрейнде адам саудасымен айналысқандардың ісі сотқа берілді

Трансұлттық топ қазақстандық қыздарды Бахрейнге жыныстық құлдыққа 5 жыл бойы сатып келген. Күдіктілердің ісі сотқа жіберілді.

Бұл туралы Orda.kz хабарлады.

Трансұлттық топтың қолынан 39 әйел зардап шекті.

– Биыл біз Қазақстан, Ресей және Бахрейн азаматтары бар 19 адамнан тұратын трансұлттық ұйымдасқан топқа қатысты тергеуді аяқтадық, олар соңғы бес жылда Бахрейнде жыныстық қанау үшін адамдарды, оның ішінде кәмелетке толмағандарды сатты. Қазіргі уақытта қылмыстық іс сотта қаралуда, - деді ОКҚ брифингінде ІІМ тергеу басқармасының бастығы Санжар Әділов.

Бұған дейін Ішкі істер министрлігі Бахрейнде 39 қазақстандық әйел жыныстық құлдықтың құрбаны болғанын хабарлаған болатын. Олар Шымкент пен Түркістан облысының тұрғындары болды.

Биыл Қазақстанда адам саудасына байланысты қылмыстар бойынша 200 қылмыстық іс ашылды.