«Қазақтелеком» топ-менеджерлері сыйақыға қарық болды

07 мамыр 2026 11:43 Ләззат Сұңқар

Фото: Қазақтелеком

«Қазақтелеком» АҚ басқарма төрағасы Бағдат Мусин мен компанияның топ-менеджерлеріне 2025 жылдың қорытындысы бойынша төленген сыйақының жалпы көлемі 752,3 млн теңге болды. Бұған жалақыдан бөлек барлық төлемдер кіреді. Бұл туралы компания жариялаған қаржылық есепте жазылған, деп хабарлайды Orda.kz.

Айта кетейік, «Қазақтелекомның» 2025 жылғы таза пайдасы шамамен екі есеге өсіп, 146,9 млрд теңгеге жеткен. Ал бір жыл бұрын бұл көрсеткіш 77,2 млрд теңге болған.

Негізгі қызметтен түскен кіріс те айтарлықтай 482,9 млрд теңгеден 568,2 млрд теңгеге дейін артқан. Ауылдық жерлердегі әмбебап қызметтер үшін берілетін субсидиялар мен өтемақыларды қоса есептегенде, жалпы табыс көлемі 587 млрд теңгеге жуықтаған.

Сонымен қатар қызмет көрсету құны да едәуір өскен — 384,9 млрд теңгеден 457,7 млрд теңгеге дейін. Соған қарамастан компанияның операциялық пайдасы 50%-дан астам өсіп, 94,5 млрд теңгеболған.

Қорытынды пайданың өсуіне негізгі әсер еткен факторлардың бірі — «тоқтатылған қызмет» деп аталатын бағыт. Бұл активтерді сату немесе бизнесті қайта құрылымдау сияқты бір реттік табыстарға қатысты. Осы бағыттағы кіріс 107 млрд теңгеден асып, өткен жылмен салыстырғанда екі есеге көбейген. Әдетте мұндай сомалар активтерді сатумен, қайта құрылымдаумен немесе компаниялар тобы ішіндегі өзгерістермен байланысты болыпты.

Сонымен қатар оператордың қаржылық шығындары да өскен — 39,7 млрд теңгеден 51,3 млрд теңгеге дейін. Бұдан бөлек, валюта бағамының айырмасынан шамамен 16,7 млрд теңге шығын келген. Бұл саланың импорттық жабдықтар мен валюта бағамына тәуелді екенін көрсетеді.

Сонымен қатар «Қазақтелеком» басшысы Бағдат Мусин «Әділет» жаңа партиясына кіргенін мәлімдеді. Оның айтуынша, оған инновациялар мен цифрландыру тақырыптары жақын, ал партияның құжаттарымен және бағдарламасымен танысқаннан кейін ол оның қызметіне қатысуға өтінім беруге шешім қабылдапты.

«Партия әлі тіркелмеген, бірақ ол жаңа қадамға қабілетті деп есептеймін», — деп мәлімдеді Мусин.

Бұған дейін наурыз айының басында Тоқаев «Қазақтелеком» АҚ басқарма төрағасы Бағдат Мусинді қабылдады.Мусин Тоқаевқа компанияның қызметі мен соңғы екі жылда жүзеге асырған негізгі инфрақұрылымдық және технологиялық жобаларының қорытындысын баяндады. Бағдат Мусиннің айтуынша, бүгінде «Қазақтелеком» 1,75 миллионнан астам үйге қызмет көрсетеді.

Оқи отырыңыз:

Жаңалықтар

барлық жаңалықтар