Бағанашылдағы даудан кейін Алматы облысы әкімінің орынбасары қызметінен кетті

Алматы облысы әкімінің орынбасары Болат Күреңбеков Бағанашылдағы балалар үйін көшіру бойынша туған даудан кейін қызметтінен кетті, деп хабарлайды Orda.kz.

Болат Қайратұлы 1977 жылы туған, қазақ, білімі жоғары, 2000 жылы Қазақстан Республикасы Ұлттық қауіпсіздік комитеті академиясын «құқықтану», 2019 жылы І.Жансүгіров атындағы Жетісу мемлекеттік университетін «мемлекеттік және жергілікті басқару», 2021 жылы І. Жансүгіров атындағы Жетісу университетін «құқықтану» мамандықтары бойынша бітірген.

Еңбек жолын 2000 жылы Қазақстан Республикасы ҰҚК Павлодар облысы бойынша департаменті басқармасының мемлекеттік қызметшілерді тексеру жөніндегі топтың жедел уәкілі болып бастаған.

Әр жылдары Қазақстан Республикасы ҰҚК Павлодар, Алматы облыстары, Алматы, Астана қалалары бойынша департаменттерінде, ҚР ҰҚК төрағасы аппаратының басшылық лауазымдарында қызмет атқарған.

2021 жылдың қазан айынан Қазақстан Республикасы ҰҚК Қостанай облысы бойынша департаменті бастығының бірінші орынбасары болды.
Болат Күреңбеков 2024 жылдың тамыз айында Алматы облысы әкімінің орынбасары болды. Араға бір жыл салып, Бағанашылдағы даудан соң қызметінен кетті.

Сондай-ақ облыстық білім басқармасының басшысы Салтанат Беспаева мен ішкі саясат басқармасының жетекшісі Ерік Әбитов қызметтерінен өз еріктерімен кетті. 

Еске сала кетсек, Бағанашылдағы №1 облыстық балалар үйін Қонаевқа көшіру жоспарланғаны туралы ақпарат тараған еді. Бұған қарсы балалар бейнеүндеу жасап, бұрынғы ғимаратта қалдыруды сұрады. Кейін Алматы облысы әкімдігі қазіргі тәрбиеленушілер Алматыда қалатынын, ал жаңа келетін балалар Қонаевтағы жаңа мекемеге орналастырылатыны айтылып еді.

21 шілде күні таңғы 8:00-дер шамасында ғимарат алдына бірнеше автобус келіп тоқтап, балаларды алып кетуге тырысқанымен, балалар оларға қарсылық танытып, автобусты жүргізбей қойды. Содан балалардың кейбірі жарақат алса, бірі оқиға орнында талып қалды. Толығырақ тілшіміздің материалынан оқи аласыз.

Сонымен қатар, жақында Қасым-Жомарт Тоқаев Алматы әкімі Дархан Сатыбалдыға балалар үйін жөндеп, оқу процесін осы Бағанашылда жалғастыруды қамтамасыз етуді, сондай-ақ мекемені қаланың балансына қабылдауды тапсырды.