Бағанашылдағы балалар үйінің қызметкерлерін басқа ұйымға жұмысқа орналастырады

Балалар үйінің тәрбиешілері жуырда оларға қысым көрсетіліп, өз еркімен жұмыстан шығу туралы өтініш жазуға мәжбүрлеп жатқанын хабарлаған еді. Алайда Алматы қаласының әкімдігі бұл ақпараттың шындыққа жанаспайтынын мәлімдеді, деп жазады Orda.kz.

Еске салсақ, облыстық балалар үйінің ұжымы заңгер Анна Черноваға бейнеүндеу жолдаған болатын. Тәрбиешілердің айтуынша, балалар үйінің басшылығы үйден шығару қаупі туындаған қиын жағдайда жетім балаларды қорғаған ұстаздардан құтылғысы келген.

Алматы қаласы әкімдігі бүгін балалар үйі ұжымымен кездесу өткенін хабарлады. Кездесуге қалалық мәслихат депутаттары, Алматы қаласы қоғамдық кеңесінің мүшелері, ҚР Оқу-ағарту министрлігінің Балалар құқығын қорғау комитетінің, Алматы қаласы мен Алматы облысының білім басқармаларының өкілдері қатысты.

«Орталық қызметкерлеріне (педагогтерге) Алматы облысынан Алматы қаласының Білім басқармасына қарасты ұйымға ауыстырылатыны айтылды. Бұл процесс еңбек құқықтарын сақтай отырып, қолданыстағы заңнамаға сәйкес шарттарды қайта рәсімдеу және әр қызметкердің жазбаша келісімімен жүзеге асырылады. Балалар үйі қызметкерлерін жұмыстан босату туралы ақпарат шындыққа жанаспайды»,  деп мәлімдеді әкімдік. 

Шенеуніктердің айтуынша, балалар үйінің тәрбиеленушілері өз орталығының аумағында тұра береді және Алматы қаласында білім алады. Жағдай әкімдіктің тұрақты бақылауында.

Оқиғаға қатысты толық ақпаратты мына жерден оқи аласыздар.  

Айта кетейік, Бағанашылдағы балалар үйіне қатысты мәселе көктемде басталған еді. Содан бері балалар үйі жанжалдан арылмады. №1 облыстық балалар үйін  Қонаевқа көшіру жоспарланғаны туралы ақпарат тарады. Бұған қарсы балалар бейнеүндеу жасап, бұрынғы ғимаратта қалдыруды сұрады. Кейін Алматы облысы әкімдігі қазіргі тәрбиеленушілер Алматыда қалатынын, ал жаңа келетін балалар Қонаевтағы жаңа мекемеге орналастырылатыны айтылып еді.

Сонымен қатар, жақында Қасым-Жомарт Тоқаев Алматы әкімі Дархан Сатыбалдыға балалар үйін жөндеп, оқу процесін осы Бағанашылда жалғастыруды қамтамасыз етуді, сондай-ақ мекемені қаланың балансына қабылдауды тапсырды.