Бақытгүл Хаменованың сіңлісі оқиғаға қатысты пікір білдірді

4,5 млн теңге пара алды деген күдікке ілінген Атырау облысы әкімінің орынбасары Бақытгүл Хаменованың сіңлісі Айнұр Хаменова атышулы оқиғаға қатысты пікір білдірді.

Ол жығылған әпкесін ғайбаттап жатқандарды сынға алды.

«Отбасымыз үшін жайсыз тиген оқиғаға байланысты қолдауларыңызды білдіріп, жылы сөзбен демеп жатқандарыңыз үшін бек рақмет! Ғайбаттың жеті атасын жаудырып, сансыз сауапқа ие қылып жатқан «тілеулестерге» де рахмет! Әке мен шешенің адал тәрбиесін көрген, ізгі істерімен талай жанның, талай игінің батасын, алғысын алған апам Бақытгүлге бір Алла өзі жар болсын» деді Айнұр.

Белгілі болғандай, Хаменованың сіңілісі «Ембімұнайгаз» АҚ баспасөз қызметінде жұмыс істейді.

«Алланың бергеніне қанағат» деген ұяда өскен апамның осы кезге дейін сүйенгені де, сенгені де — бір Алла. Екі баласына, туған-туыстарына көңіл бөлетін уақыты болмай, жауапкершілікпен еңбек еткеніне көбіңіз куәсіз. Әлі-ақ реттелер жағдай. Жығылған кезде жұдырықтамай, сүрінген сәтте сынамай, жай ғана адам болып, тілеулестік танытқан әрқайсысыңызға Алла разы болсын» деді Айнұр Хаменова.

Еске салсақ, Атырау облысы әкімінің орынбасары Бақытгүл Хаменова мен облыстық мәдениет басқармасының басшысы Ақылбек Рысқалиев 4,5 млн теңге пара алды деген күдікке ілінген. Кейін Хаменова үйқамаққа жіберілді. Оны сотта «жалғызбасты әйел» болғандықтан, жазасы жеңілдеді деп түсіндірді.