Бақытгүл Хаменованың ісі сотқа жіберілді

Атырау облысы әкімінің орынбасары Бақытгүл Хаменованың ісі сотқа жол тартты.

Бұл туралы Атырау облыстық сотының баспасқз қызметі хабарлады.

«26 мамырда Атырау қаласының №2 сотына Атырау облысы әкімінің орынбасары Бақытгүл Хаменова мен Атырау облысының мәдениет, тілдерді дамыту және архивтер басқармасының басшысы Ақылбек Рысқалиевке қатысты қылмыстық іс түсті. Хаменова мен Рысқалиевке ҚР Қылмыстық кодексінің 366-бабы 3-бөлігінің 2-тармағы (алдын ала сөз байласу бойынша бір топ адамдар пара алу) бойынша айып тағылуда» деп хабарлады сейсенбі күні Атырау облыстық сотының баспасөз қызметі.

Еске салайық, 10 желтоқсанда Хаменованың сыбайлас жемқорлыққа қатысы бар деген күдікпен ұсталғаны белгілі болды. Оған Абай ескерткішін орнатуға 145 миллион теңгеге тендерден қайтарып алу ретінде 4,5 миллион теңге көлемінде пара алды деген айып тағылып отыр. Ұстау аясында қазақстандықтар Хаменованың тұңғыш президент Нұрсұлтан Назарбаев туралы жағымпаз сөздерін, оның Астананың атын Елбасы деп өзгерту, сондай-ақ Қазақстан Конституциясында Назарбаевтың мәртебесін бекіту идеясын еске алды.

12 желтоқсанда Хаменова үйқамаққа алынды. Оның үйқамаққа шығуына жалғыз басты ана статусы себеп болған. Алайда желтоқсанның 23-і күні шенеуніктің үйқамағын уақытша ұстау изоляторында ұстауға ауыстырды.