Бұрынғы вице-министр Байжүнісовке қарсы қылмыстық іс тоқтатылды

Бұрынғы Денсаулық сақтау вице-министрі Ерік Байжүнісовке қатысты қылмыстық іс тоқтатылды. Бұл туралы Сыбайлас жемқорлыққа қарсы іс-қимыл агенттігі хабарлады.

– 2021 жылғы 15 желтоқсанда жоғарыда аталған қылмыстық іс Қазақстан Республикасы Қылмыстық іс жүргізу кодексінің 35-бабы 1 - бөлігі 1-тармағының тәртібінде қылмыстық құқық бұзушылық құрамының болмауына байланысты тоқтатылғанын хабарлаймыз, - делінген тілшінің сауалына берілген ресми жауапта.

2020 жылдың қыркүйегінде бұрынғы Денсаулық сақтау вице-министрі, «дәрілік заттарды сараптау ұлттық орталығының» бас директоры Ерік Байжүнісовке қатысты бірнеше рет пара алды деген күдікке байланысты үйқамақ түріндегі бұлтартпау шарасы тағайындалған еді.

Сол кезде сыбайлас жемқорлыққа қарсы қызмет бұрынғы вице-министрге электронды бақылау білезігін кигенін мәлімдеді. Істің басқа егжей-тегжейлері тергеу мүддесі үшін жария етілмеді.