Бұрынғы трамвай тұрағының орнына саябақ салынып жатыр – әкімдік

Алматыда бұрынғы трамвай депосының аумағында қонақ үй, тұрғын үй кешені немесе мейрамхана салынбайтындығы туралы қала әкімдігі хабарлады.

«Орталықтың тұжырымдамасын сақтау үшін және қоғамдық пікірді ескере отырып, жобаны бюджеттік қаражат есебінен бұрын әзірленген жобалық - сметалық құжаттама аясында жалғастыру туралы шешім қабылданды. Тұрғын үй, кәсіпкерлік нысандар (қонақ үйлер, мейрамханалар) салу жоспарланбаған», - делінген хабарламада.

Depo Evolution Park жастар орталығы бұрынғы депо аумағында салынуда. Жоба бойынша олар көркемөнер шеберханалары мен зертханаларын, өндірістік шеберханаларын, оқу сыныптарын, көрме бөлмелерін, қолөнер студияларын, кинодәріс залын, көркем студиялар, балалар орталығын, коворкинг, кітапхана, оқу залдарын ұйымдастыруды жоспарлап отыр.

«Сонымен қатар, қажетті экстремалды саябақ, арт-парк, воркаут және спорт алаңдары, би алаңдары, амфитеатр және жастардың лофт-орталығы қажет инфрақұрылыммен қамтамасыз етіледі. Жоба инвесторлармен бірге көпшіліктің пікірін ескере әзірленді», - деді әкімдік.

Тұрғындар бұған дейін бұрынғы трамвай депосы аумағында қонақ үй салу мәселесіне алаңдаушылық білдірген.

Depo Evolution Park құрылысы жоспарын 2021 жылдың соңында аяқтайды. «Астана Құрылыс ҰҒК» АҚ қайта құруға жауапты. Жобаның құны 2,5 миллиард теңге.