БҚО-да жалған дипломы бар медбике 10 жыл бойы адамдарды емдеген

Батыс Қазақстан облысы Жанғала аудандық ауруханасында жалған білімі бар медбике он жылдай жұмыс істеген. Бұл фактіні мемлекеттік мекеме директоры қызметкерлердің білім сәйкестігін тексеру кезінде анықтады.

Айта кетейік, білім сәйкестігін тексеру кезінде медициналық мекеме өз қызметкерлерінің дипломын екі рет тексереді. Ол үшін диплом тізімдері мамандар даярлайтын және дайындайтын жоғары оқу орындары мен колледждерге жіберіледі.

– Дәрігерлік амбулаторияның 37 жастағы қызметкерінің ісінде медициналық колледжді бітіргені туралы дипломның көшірмесі болған. Бірақ ақпаратты тексергенде ондай түлек жоқ болып шықты. Әйел адам ол уақытта декреттік демалыста болған. Дипломның түпнұсқасын жоғалтып алғанын айтып, өз еркімен жұмыстан кету туралы арыз жазған. Құқық қорғау органдарына жүгінуге мәжбүр болдым. Бұл фактіні ескермеуге болмайды, - деді БҚО Жанғала ауданы орталық аудандық ауруханасының директоры Сержан Есенғұбеков.

Полицейлер бұл факті бойынша сотқа дейінгі тергеу басталғанын хабарлады. Жалған құжатты кім жасағаны анықталды. Аталмыш факті бойынша Қазақстан Республикасы Қылмыстық кодексінің 385-бабының 3-бөлігі («Жалған құжаттарды қолдан жасау немесе өткізу») бойынша сотқа дейінгі тергеу басталды.