БҚО-да тағы екі ауылды су басты

Батыс Қазақстан облысында су тасқыны тағы бір ауданды, анығырақ айтқанда Жәнібекті басып жатыр. Бұл жерлерде  еріген қар суы Таловка және Жақсыбай ауылдарының үйлеріне кіріп, жергілікті тұрғындардың берекесі кеткен.

Жақсыбай ауылы тұрғындарының айтуынша, көшедегі су 50 сантиметрге дейін жетеді. Ауыл тұрғындарының көпшілігінің үйлерін су басты. Қауіпсіз жерге шығарылған тұрғындар жергілікті мектепке орналастырылды, бірақ жіберілген суреттерге қарағанда, мұнда ешқандай жағдай жоқ – балалар мен қарттар еденде ұйықтап жатыр.

Тұрғындар Жақсыбайда көп мал қырылғанын, оның ішінде  жаңа төлдердің шығындары көп екенін айтады.

«Жақсыбай ауылында 62 тұрғын үйді су басып, 637 адам қауіпсіз жерге көшірілді. Жергілікті балабақшада 305 адам болса, оның 89-ы балалар, қалғандары туыстарында. Таловка ауылында екі тұрғын үйді су басып, сегіз адам эвакуацияланды, оның екеуі балалар»  делінген ТЖД хабарламасында.

Төтенше жағдайлар департаменті Жәнібек өңірінде төтенше жағдай режимі енгізілмегенін баса айтты.

Батыс Қазақстан облысында өткен тәулікте үш ауданда: Қаратөбе, Бөрлі және Шыңғырлау ауданында ауылдарды су басу салдарынан төтенше жағдай орын алған болатын.

Авторы: Абай Біржанов, БҚО.