БҒМ ҚазҰПУ студенттерінің жатақханадан шығарылмайтынын хабарлады

Білім және ғылым министрлігі студенттерді ҚазҰПУ жатақханасынан шығару туралы ақпаратқа қатысты пікір білдірді.

«Студенттер оқу жылының соңына дейін жатақханада тұра алады» деді ведомстводағылар.

ҚР Білім және ғылым министрлігі Абай атындағы Қазақ ұлттық педагогикалық университетінің (ҚазҰПУ) жатақханасынан студенттердің шығарылуы туралы ақпаратқа қатысты пікір білдірді.

Бұған дейін студенттердің  жатақханадан  шығарылатындығы  туралы хабарланған болатын.

— Қазіргі уақытта жатақханада тұрып жатқан студенттер  оқу жылының соңына дейін тұра алады. Бұл мәселені Абай атындағы ҚазҰПУ басшылығы пысықтайды. Университет коменданттарына студенттерді шығармау туралы тапсырма берілді, - деді БҒМ баспасөз хатшысы Мөлдір Әбдуалиева.

Студенттерді жатақханадағы орынмен қамтамасыз ету мәселесі министрліктің ерекше бақылауында, деп қосты ведомство.

Университет жатақхана салуға рұқсат алды. Жаңа ғимараттың салынуы студенттерді жатақханамен қамтамасыз етілуін шешеді.

«Басшылық қаладағы  студенттерді жатын орынмен қаматамасыз ету  үшін қосымша орындар табу бойынша белсенді жұмыс жасауда. Оқу жылы басталмай тұрып жатақхана ғимараты жалға алынып, жатақханалармен меморандумдар жасалған» делінген ақпаратта.