Бүлдіршінді оқтаумен ұрған балабақша қызметкері видеоға түсіп қалды

Әлеуметтік желіде тәрбиеші балалардың құлағын тартып, тіпті біреуінің ернін жыртып жіберген бейнежазба таралды. Қызу талқыланып жатқан бейнежазбадан балабақша тәрбиешісінің кішкентай қыздың шашынан сүйрегенін көруге болады.

Бейнежазба авторы Білім және ғылым министрі Асхат Аймағамбетовтың Instagram-дағы ресми парақшасын белгілеген.

– Ерні жыртылған, денесінде қатты соққыдан алған іздер бар. Құлағын жұлып, шашынан сүйреп жүр. Мынау расымен балабақша ма? Асхат Аймағамбетов, сіз министр болғалы мұндай жағдай жиі қайталанып жүр. Тәрбиешінің бұл әрекеті қылмыс қана емес, адамдар соның кесірінен басқа да тәрбиешілер мен балабақшаларға сенуден қалады, — деп жазды видео авторы.

Алматы қалалық полиция департаменті аталған факті ҚР Қылмыстық кодексінің 140-бабы 2-бөлігі бойынша сотқа дейінгі тергеп-тексерудің бірыңғай тізіліміне тіркелгенін хабарлады. Қылмыстық істің материалы Жетісу ауданының унитарлық кәсіпорнында өңделуде.

– Тергеу аясында өрескел фактілердің мән-жайы міндетті түрде зерттеліп, тәрбиешінің әрекетіне құқықтық баға беріліп, соған сәйкес жауапкершілікке тартылады, - деп хабарлады Қалалық полиция департаментінің баспасөз қызметі.