«Бұл қылмыс, геноцид»: Елге белгілі дәрігер вакцина туралы пікірін айтты

Былтыр пандемия өршіген сәттен бастап халыққа әлеуметтік желі арқылы емделу жолдарын көрсетіп, кеңес берген белгілі дәрігер Айна Бәкиева «Qasqa Jol» ютуб арнасында қонақта болды.

Бұл туралы Orda.kz хабарлайды.

Сұхбат барысында вакциналау қаупі, Үкімет жүмысының қателіктері туралы айтылды. Дәрігердің айтуынша, вакцина салу уақытының қысқаруына себеп – екпелердің жарамдылық мерзімінің өтуі.

– Цой мырза 10 миллион доза вакцина алды. Оны ұятқа қалдырамыз ба? Тауысайық дейді. Қазір вакцина салу уақыты неге қысқарып жатыр? Менің ойымша, алынған вакцинаның мерзімі өтіп жатыр. Вакцинаның жарамдылық мерзімі 6 ай. Көктемнен бастап есептесек тамыз айы алтыншы айға сәйкес келеді. Бұл жердегі «математика» осындай. Бұл қылмыс, геноцид, - дейді дәрігер.

Айна Бәкиева Президенттің медицинаға өте көп қаржы бөлетінін айтып, халыққа көңіл бөледі деп ойлайтынын жеткізді.

– Мен Тоқаевқа бірқатар үндеу жасадым. Мен ғана емес бүкіл халық үндеу жасауда. Мен әлі күнге дейін Президент халықтың жағдайына көңіл аударады деп үміттенемін. Мемлекет басшысы денсаулық сақтау саласына өте көп қаражат бөледі. Ол денсаулық сақтау министріне, бас санитар дәрігерге, басқа да мамандарға тапсырма береді және сенеді. Қазіргі уақытта сенген адамдары ұятқа қалдырып отыр, - деді Бәкиева.

Сондай-ақ, дәрігер вакцина арқылы сынақ жасалып жатыр деп ойлайтынын да жеткізді.

– Семейде атом бомбасына сынақ жасаса, қазір вакцина арқылы сынақ жасап жатыр. Қандай айырмашылық бар? Оның үстіне адамдар өз аяғымен барып жатыр. Себебі, баруға мәжбүр, - дейді ол.