"Бұл - өте қымбатқа түсетін процесс". Бекетаев партия құрғысы келетіндер туралы айтты

Оның сөзінше, партия құруға өтініш білдіргендер оппозициялық көзқарастағылар емес.

"Шынында да өтінімдер келіп түсті. Бірақ мен оларды оппозициялық деп атамас едім. Адамдар тобы саяси партия құрғысы келетіні жөнінде Әділет министрлігіне сұраныс жолдады. Бұл өтінімдер заңнама талаптарына сай болған жоқ. Сол себепті оларды тіркеуден бас тартылды. Бұл адамдар тобы қателікті қайта түзеп, өтінім жолдай алады" деді Бекетаев.

Дегенмен министр өз сөзінде саяси партия құруға өтініш берген адамдардың атын атаған жоқ, санын да айтпады.

"Қанша адамнан партия құру туралы ұсыныс түскенін, қай адам түсіргенін айта алмаймын. Маған бұл мәліметтерді таратуға заң рұқсат бермейді. Себебі бұл – өтінім берген сол адамдар тобының құқығы. Әділет министрлігі мұндай мәліметтерді жариялай алмайды" деді ол.

Сонымен қатар Бекетаев Қазақстанда саяси партия құру қымбатқа түсетінін атап өтті.

"Бұл – өте қымбатқа түсетін процесс. Бүгін партия құру бастамасын ойлаған адам ертең оны құра салмайды. Ол абыройлы әрі артынан еретін адамдары бар екенін, саяси партияны құра алатын ресурсы барын дәлелдеуі тиіс. Заң талаптары осындай" деді Бекетаев.

Қазақстанда "Саяси партиялар туралы" заңға өзгеріс енгеніне қарамастан елде партия құрғысы келетін азаматтар тіркеу кезіндегі бюрократиялық кедергіге тап болатынын айтып, жиі шағымданады.

Қазіргі кезде Қазақстанда ресми тіркелген алты партия бар. Олардың үшеуінің өкілдері қазіргі парламентте отыр.