«Б» корпусына үміткерлер мемлекеттік тілден тест тапсырады

ҚР Премьер-Министрінің мәлімдеуінше Мемлекеттік қызметтің «Б» корпусының лауазымына орналасуға үміткерлерге «Қазтест» жүйесі бойынша қазақ тілінен тест өткізу жоспарланған, деп хабарлайды ORDA тілшісі.

— «Қазақстан Республикасындағы тіл туралы» Заңында (бұдан әрі – Заң) мемлекеттік тілдің қоғамдық қатынастардың барлық салаларында, оның ішінде мемлекеттік басқаруда қолданылуының құқықтық негіздері бекітілген. Оны оқып-үйрену мен дамыту үшін жағдай туғызу жөніндегі міндеттер айқындалған. Заңның 23-бабының 3-тармағына сәйкес мемлекеттік тілді белгілі бір көлемде және біліктілік талаптарына сәйкес білуі қажет кәсіптердің, мамандықтардың және лауазымдардың тізбесі Қазақстан Республикасы заңдарымен белгіленеді, деді Үкімет басшысы.

Оның атап өтуінше, мемлекеттік тілдің кең ауқымды қолданысын қамтамасыз етуге бағытталған Қазақстан Республикасындағы тіл саясатын іске асырудың 2020-2025 жылдарға арналған мемлекеттік бағдарламасы жүзеге асырылуда.