Бүгіннен бастап куәліксіз көлік жүргізуге болады

Бұған дейін қазақстандықтардың 13 ақпаннан бастап  жүргізуші куәлігінсіз көлік жүргізуге рұқсат етілетіндігі туралы ORDA хабарлаған.

Естеріңізге сала кетсек, 21 қаңтар күні Парламент сенатының жалпы отырысында «Қазақстан Республикасының кейбір заңнамалық актілеріне жол жүрісі мәселелері бойынша өзгерістер мен толықтыру енгізу туралы»  Заңы екі оқылымда қаралып, қабылданған болатын.

Бұған дейін Ерлан Тұрғымбаев жол қозғалысы мәселелері бойынша Қазақстан Республикасының кейбір заңнамалық актілеріне Президент қол қойған түзетулер 2021 жылғы 13 ақпанда күшіне енетіндігін айтқан болатын.

«Жүргізушілердің жүргізу құжаттарын алып жүру және ұсыну міндеттерін жою – бұл қазіргі заманғы технологиялық полицияның дамуына жасалған тағы бір қадам. Мемлекет көлік басқаруды едәуір жеңілдетті, бірақ жүргізушілер басқа көліктердің қауіпсіздігі үшін өз жауапкершіліктерін ұмытпауы керек. Сондықтан, осы мүмкіндікті пайдалана отырып, мен жүргізушілерді де, жаяу жүргіншілерді де жол ережелері мен көлік жүргізу мәдениетін қатаң сақтауға шақырамын», – деп атап өткен ішкі істер министрі Ерлан Тұрғымбаев.

Құжатта елімізде берілген жүргізуші куәлігі мен көлік құралын тіркеу туралы куәлікті өзімен бірге алып жүруді талап ететін норманы қолданыстағы заңнамадан алып тастау айтылған. Яғни, көлік иесі полиция қызметкерлеріне  жеке куәлігін ғана ұсынады. Тәртіп сақшылары планшет арқылы электрондық базадағы қажетті құжаттары бойынша тексеру жүргізе алады.

Осы жылғы 1 ақпанда президент Қасым-Жомар Тоқаев «Қазақстан Республикасының кейбір заңнамалық актілеріне жол жүрісі мәселелері бойынша өзгерістер мен толықтыру енгізу туралы» Қазақстан Республикасының заңына қол қойды.