Бүгін жаңа қаулы күшіне енді. Не өзгереді?

Денсаулық сақтау вице-министрі - Қазақстанның бас санитар дәрігері Ерлан Қиясовтың сенбі күні қабылдаған жаңа қаулысы бүгін, 27 қыркүйек күшіне енді. Онда вакцинацияланған азаматтар Ashyq қосымшасында «жасыл» мәртебесін қандай жағдайда жоғалтатыны айтылған.

Бұл туралы Orda.kz хабарлады.

Бұйрық бойынша азаматтар COVID-19-ға қарсы екпенің бірінші компонентін алған бойда оларға «жасыл» мәртебе берілетіні еске салынған. Бірақ ол тек 21 күнге жарамды болмақ. Егер адамдар екпенің 2 компонентін алмаса, онда олардың мәртебесі қайта «көк» түс болады. Тек екі компонентті де алған азаматтарда «жасыл» мәртебе болады. Ол 1 жылға жарамды.

Еске салсақ, «жасыл» мәртебеге үш ай ішінде коронавируспен ауырғандар, медициналық рұқсатнамасы барлар, жүкті әйелдер, сондай-ақ бір апта ішінде ПТР сынақтан өткендер ие.

Сондай-ақ, жаңа қаулыда 27 қыркүйектен бастап салтанатты, еске алу және отбасылық шараларды өткізуге рұқсат берілді.

«Жасыл» аймақтағы өңірлердің тұрғындары 100 адамға ғана салтанатты жиын өткізе алады. «Сары» аймақтың тұрғындары 70 адаммен, «қызыл» аймақ 50 адаммен жиын өткізуге рұқсат берілген.